જૂનાગઢ જિલ્લાના કેશોદ તાલુકાના પ્રાસલી ગામે રાજકીય અને સામાજિક ઉર્જાથી ભરપૂર વાતાવરણ વચ્ચે આમ આદમી પાર્ટીની “પરિવર્તન લાવો, ખેડૂત બચાવો” યાત્રાને જંગી સમર્થન મળ્યું હતું. ગ્રામ્ય વિસ્તારમાં ખેડૂતોના પ્રશ્નોને કેન્દ્રમાં રાખી શરૂ કરાયેલ આ યાત્રા પ્રાસલી ગામે ભવ્ય સ્વાગત સાથે પહોંચી હતી, જ્યાં મોટી સંખ્યામાં ખેડૂત ભાઈઓ, સ્થાનિક આગેવાનો, યુવાનો અને મહિલા કાર્યકરો ઉત્સાહપૂર્વક જોડાયા હતા.
ગામમાં યોજાયેલી વિશાળ સભા દરમિયાન ખેડૂતોના હિત સાથે જોડાયેલા વિવિધ મુદ્દાઓ પર વિસ્તૃત ચર્ચા કરવામાં આવી હતી. ખાસ કરીને પાણીની સમસ્યા, પાક વીમાની અસરો, વીજળી પુરવઠાના પ્રશ્નો તેમજ ખેતીના વધતા ખર્ચને લઈને ખેડૂત વર્ગે પોતાની ચિંતાઓ વ્યક્ત કરી હતી. વક્તાઓએ જણાવ્યું હતું કે ખેતી આધારિત અર્થવ્યવસ્થા મજબૂત બનાવવા માટે ખેડૂતોને યોગ્ય સહાય અને નીતિઓ જરૂરી છે, અને આ યાત્રા દ્વારા ખેડૂતોની અવાજને સત્તાના દરબારમાં પહોંચાડવાનો પ્રયત્ન કરવામાં આવી રહ્યો છે.
આ પ્રસંગે પ્રવિણ રામ, ઇસુદાન ગઢવી સહિત પાર્ટીના અનેક આગેવાનો અને કાર્યકરો હાજર રહ્યા હતા. આગેવાનો દ્વારા ખેડૂત હિતને કેન્દ્રમાં રાખી પરિવર્તનની જરૂરિયાત પર ભાર મુકવામાં આવ્યો હતો. તેમણે કહ્યું કે ગ્રામ્ય વિસ્તારોમાં વિકાસ અને સુવિધાઓનો સમતોલ વિકાસ જરૂરી છે, અને ખેડૂતોના પ્રશ્નોનું તાત્કાલિક નિરાકરણ લાવવા માટે રાજકીય અને સામાજિક સ્તરે સક્રિય પ્રયાસો કરવાની જરૂર છે.
સભા દરમિયાન પરિવર્તનના નારા ગૂંજી ઉઠ્યા હતા, જેના કારણે સમગ્ર વિસ્તારમાં ઉત્સાહ અને ઉર્જાનો માહોલ સર્જાયો હતો. કાર્યક્રમ દરમિયાન મોટી સંખ્યામાં ખેડૂતોએ પાર્ટીનો ખેસ ધારણ કરી પક્ષમાં જોડાઈ પોતાનું સમર્થન વ્યક્ત કર્યું હતું. યુવાનો અને મહિલા કાર્યકરોની નોંધપાત્ર હાજરીએ કાર્યક્રમને વધુ જીવંત બનાવ્યો હતો.
રાજકીય વર્તુળોમાં ચર્ચા છે કે આ પ્રકારની યાત્રાઓ દ્વારા ગ્રામ્ય વિસ્તારોમાં સંગઠન મજબૂત બનવાની સાથે ખેડૂતોના પ્રશ્નો વધુ અસરકારક રીતે રાજકીય મંચ સુધી પહોંચશે. પ્રાસલી ગામની આ સભાએ દર્શાવ્યું કે ખેડૂતો પોતાના હકો અને સમસ્યાઓને લઈને સજાગ બની રહ્યા છે અને પરિવર્તનની આશા સાથે રાજકીય પ્રવાહમાં જોડાઈ રહ્યા છે.
ધ્રુવ ચુડાસમા (કેશોદ)
